 |
| زوجي يسخر الجن |
زوجي يسخر الجن
من فترة اتقدملي حد اهلى شافوه كويس و غني و شافوا انهم بالطريقة دي هيسعدوني طول حياتي منكرش إني كنت فرحانة لأنه كان شاب لطيف وجميل وفي كل مواصفات أي بنت تتمناها
بعد ٣ شهور أتجوزنا تصرفاته كانت شوية غريبة يعني عمره ما صلى دايما قافل على نفسه أوضة ويغيب بالساعات ، مبيشتغلش و مع ذلك مفيش مصدر صريح لفلوسه الكتير دي إلا إني كنت بطنش وبقول طبيعي عشان لسة متجوزين جديدلحد ما فيوم صحيت من النوم الساعة ٣ الفجر أشرب سمعت صوت خارج من الأوضة اللي بيقعد فيها كانت مضلمة خالص وطالع منها دخان قربت اسمع ايه الصوت دا يمكن أفهم حاجة قربت براحة وفجأة....
الباب أتفتح لوحده ولقيت جوزي شكله متغير أوي وبيزعق ويقولي قولتلك متجيش هناااا
اتخضيت من المنظر قولتله انت لازم تعرفني انت بتعمل إيه
وفضلت أعلى في صوتي وأعيط
لحد ما قالي ....
انا بحضر جن ووارث علم السحر عن بابا هو إللي قرأ عليا طلاسم وسكن الشياطين جوايا من وأنا صغير ، هما بيساعدوني أجيب فلوس كتير واعمل حاجات كتير أنا بقى عندي قوة جبارة بقيت بتحكم في حاجات كتير دا أنا حتى بقدر أعرف حاجات عن الناس عمرهم ما حكوها لحدكلامه كان بنسبالي صدمات مكنتش عارفة أتصرف قولتله أنا مش هعيش معاك ولا ثانية أنت كافر
قالي لا هتعيشي لإنك لو مشيتي أو حد عرف باللي أنا قولته مش هتشوفي أمك تاني ، هحبسها في العالم السفلي
فضلت أبكي لوحدي كتير مش عارفة اتصرف ازاي انا عايشة مع حد كافر وبيحضر جن في بيتي يارب حلها من عندك
نمت وصحيت لقيته بيتصرف طبيعي جدا ومحضر فطار وبيفطر بعدها قالي مش حابة تتعلمي السحر ؟
متبصليش كدا ، عمرك ما اتمنيتي أنك تاخدي حقك من حد أذاكِ
بلاش دي عمرك ما اتمنيتي إنك تعرفي كل حاجة عن حد منغير ما يقولهالك ...
للحظة بدأت كلماته تأثر عليا سرحت شوية وهو قام ومن عادته أنه بيفضل فترة طويلة في الحمام ولما خرج قالي مستعدة تنضمي لينا ؟
قولتله إيه المطلوب
قالي تسجدي للشيطان ، وتكفري بالله علنًا وجهرًا ، وهتروحي معايا مقابر قديمة محدش بيزورها ودي بندفن فيها السحر وصعب حد يعرف يفكه ، طلبت منه إني أروح الأول أشوف السحر بعيني وأعرف كل حاجة قبل ما أكون معاه ، دخلنا الترب جسمي قشعر من الخوف ، يعني هو ده حالنا هنكفر عشان في الآخر ندفن هنا ، طلبت منه نروح وإني هحتاج وقت أفكر ، وإني هروح عند أمي أعصابي تهدىروحت لأمي وغصب عني فضلت أبكي واحكيلها عن كل حاجة ، فضلت تهديني و قالتلي متخافيش مش هيقدروا يعملوا حاجة ولا ليا ولا ليكي وربنا هينصرنا أخدتني وروحنا لشيخ في مسجد بدأت احكيله ويسمعني ، وبعدها قالي أنا محتاح أشوف جوزك قولتله هو أكيد موجود دلوقتي يلا نروح البيت ، وبالفعل روحنا و فتحت الشقة بالفتاح ، جوزي أول ما شافه قاله أطلع برا
الشيخ رد قاله أنت اللي هتطلع يا نجس وهصرف كل جن معاك وهحرقه بعون الله وبدأ الشيخ يقرأ الرقية الشرعية وآيات من كتاب الله عز وجل ، فوقع جوزي على الأرض وفضل يقول ساعدوني متتخلوش عني دلوقتي متسيبونيش إزاي تنقلبوا عليا ف أكتر وقت محتاجكم وجسمه فضل يتنفض بشكل مريب على الأرض لمدة عشر دقايق والشيخ مبطلش قرأة وأنا وأمي واقفين مرعوبين وبنبكي
بعد عشر دقايق جوزي فاق وبص للشيخ وقاله أنا عاوز أتوب دلني على الطريق أكفر بيه عن ذنوبي أنا كفرت بالله وهما تخلوا عني وسابوني رد الشيخ وقاله أنت دلوقتي تقدر ترجع للحق وتتوب إلى الله عز وجل وتحاول تنسى حياتك التانية ، كنت مقررة إني هنفصل عنه لكنه حاول بكل الطرق نرجع وبعد فترة رجعتله لما أتأكدت إنه أتغير وتاب و بقيت حياتنا مستقرة وخلفنا مالك كمان ...
بعد مرور ٥ سنين
_ ماما
_ نعم يا مالك
_ أنا قررت أكون زي بابا
_ شاطر يا حبيبي زيه إزاي بقى
_ هكون ساحر كبير وأعرف كل حاجة محدش يعرفها
مريم محمد مصطفى
تعليقات
إرسال تعليق